ADLAW 6: PAG-AMPO NGA ALANG SA EBANGHELYO
Bug. 6:1-2; Rom. 2:4; Buh. 26:20; Mar. 1:15; 1 Tim. 2:4a
Nga modagan ang puting kabayo sa ebanghelyo ug giyahan sa mainantoson nga Dios ang mga tawo nga maghinulsol, mobalik Niya ug motuo sa ebanghelyo segun sa tinguha Niya nga maluwas ang tanang tawo (Bug. 6:1-2; Rom. 2:4; Buh. 26:20; Mar. 1:15; 1 Tim. 2:4a).
Bug. 6:1-2—Ug nakakita ko sa dihang giablihan sa Cordero ang usa sa pito ka timbre, ug nadungog nako ang usa sa upat ka buhing binuhat nga niingon sama sa tingog sa dalugdog, Ari. Ug ania karon, nakita nako ang kabayong puti, ug dunay bayanan sa pana ang nagkabayo niini; ug gihatagan siyag purongpurong, ug nilakaw siya nga nagbuntog ug aron mobuntog.
Rom. 2:4—O gitamay ba nimo ang kadagaya sa Iyang kalulot ug pagkamapailobon ug pagkamainantoson, sa walay pagkasayod nga ang kaayo sa Dios maggiya nimo nga maghinulsol?
Buh. 26:20—Gimantala hinuon nako una ngadto sa mga taga-Damasco ug sa Jerusalem ug sa tibuok nasod sa Judea ug sa mga Gentil nga maghinulsol sila ug mamalik sa Dios, nga maghimog mga buhat nga angay sa paghinulsol.
Mar. 1:15—Ug niingon, Natuman na ang panahon ug duol na ang gingharian sa Dios. Paghinulsol mo ug tuo sa ebanghelyo.
1 Tim. 2:4—Nga nagtinguha nga maluwas ang tanang tawo ug hingpit nga makaila sa kamatuoran.
Pagpangalagad: Ang Tinuod nga Mga Pag-ampo Mga Pag-ampo nga Naglambigit sa Duha ka Tagtungod
Ang Roma 8:26 ug 27…niingon nato nga dili ta makamao sa angay natong iampo, apan nangamuyo ang Espiritu Santo sa sulod nato sumala sa tuyo sa Dios. Sa pagkatinuod, dili ta makamaong moampo. Nasayod ta sa kasagarang ginganlan sa mga tawog pagpangamuyo, apan diyotay ra tag nasayran bahin sa pag-ampong gihisgotan sa Kasulatan. Sa unang pagbasa nako ning duha ka versiculo sa Roma 8, gituki nako ang kahulogan niini. Sa nagsakit ko, naghunahuna ko nga dili ba nag-ampo man ko sa Dios ug nangamuyo Niya nga ayohon ko? Sa nanginahanglan ko, dili ba nag-ampo man ko sa Dios ug nangamuyo Niya nga padad-an kog sangkap? Nganong niingon man ang Kasulatan nga wala ta masayod unsay angay natong iampo? Inanay kong gipakita sa Ginoo nga tinuod gyong wala ta masayod unsang pag-ampoa ang gitinguha sa Dios….Kini ang kaluyahon nato. Salamat sa Dios nga ning kaluyahona nato, niduyog sa pagtabang kanato ang Espiritu mismo ug nangamuyo alang nato sa mga pag-agulong dili ikasulti.
Mga igsoon, ang tinuod nga mga pag-ampo mao ang Espiritu Santo sa sulod sa tawo nga nagpadayag sa tinguha sa Dios pinaagi sa tawo. Sa ato pa, ang tinuod nga mga pag-ampo mga pag-ampo diay nga naglambigit sa duha ka tagtungod. Dili kini tawo ra nga nag-ampo sa Dios; ang Espiritu kini nga nasagol sa tawo, nagsul-ob og tawo, ug nausa sa tawo sa pag-ampo. Sa gawas ang tawo maoy nag-ampo, apan sa sulod ang Espiritu maoy nag-ampo. Nagpasabot kini nga nagpadayag ang duha ka tagtungod sa mao rang pag-ampo sa samang higayon. Hinumdomi nga kini ra gyod ang pag-ampong gihisgotan sa Kasulatan. (Lessons on Prayer, pp. 18-19)
© Living Stream Ministry. Used by permission.
ADLAW 7: PAG-AMPO NGA ALANG SA MGA GILUTOS, GIDAUGDAOG, UG NAG-ANTOS
1 Ped. 4:12-14; 5:9-10
Nga lipayon, hingpiton, ug lig-onon sa Dios sa tanang grasya ang mga igsoon sa tibuok yuta, ilabi na ang mga gilutos, gidaugdaog, ug nag-antos sa kawalad-on ug mga pagsulay (1 Ped. 4:12-14; 5:9-10).
1 Ped. 4:12-14—Mga hinigugma, ayawg hunahunaa nga katingad-an ang daw kalayong pagsulay diha ninyo, nga niabot aron mosulay ninyo, nga morag katingad-ang mahitabo kaninyo; magkalipay hinuon mo kay nakaambit mo sa mga pag-antos ni Cristo, aron sa pagpadayag sab sa Iyang himaya mahugyawon gyod mong magkalipay pag-ayo. Kon gipakaulawan mo sa ngalan ni Cristo, bulahan mo, kay nagpabilin nganha ninyo ang Espiritu sa himaya ug sa Dios.
1 Ped. 5:9-10—Suklan ninyo siya, nga magmalig-on sa inyong pagtuo, sa nahibaloan ninyo nga gituman ang mao rang mga pag-antos diha sa inyong kaigsoonang naa sa kalibotan. Apan ang Dios sa tanang grasya, Siya nga nagtawag ninyo ngadto sa Iyang walay kataposang himaya diha ni Cristo Jesus, sa makaantos namo sa makadiyot, Siya mismo ang maghingpit, magtukod, maglig-on, ug magpasukad ninyo.
Pagpangalagad: Paglabay og Kalayo sa Yuta aron Magpahamtang sa Paghukom sa Dios sa Yuta
Niingon ang [Bugna 8:5], “Ug gikuha sa Manulonda ang insensaryo ug gipuno kini sa kalayo sa halaran ug gilabay kini sa yuta; ug dihay mga dalugdog ug mga tingog ug mga kilat ug linog.”…Ang paghukom sa Dios sa yuta tubag man Niya sa mga pag-ampo sa mga balaan nga naay Cristo nga incienso. Bisan naabli na ang ikaunom nga timbre ug andam nang patingogon ang pito ka trumpeta, walay mahitabo kon dili pa moanhi si Cristo aron maghalad sa mga pag-ampo sa mga balaan ngadto sa Dios uban Niya nga incienso. Nianang panahona, dunay mga dalugdog, mga tingog, mga kilat, ug linog. Nagpakita kini nga samtang tuyo sa Dios nga ipahamtang ang Iyang paghukom sa yuta, gikinahanglan gihapon ang mga balaan nga mobulig Niya pinaagi sa ilang mga pag-ampo. (Life-study of Revelation, pp. 279-280)
© Living Stream Ministry. Used by permission.
ADLAW 8: PAG-AMPO NGA ALANG SA MGA WALA NAY TIGOMTIGOM, NASAAG, UG NA-BACKSLIDE
Efe. 5:14; Sant. 5:19; Gal. 6:1
Nga madasig ang mga magtutuong wala nay tigomtigom, mapahiuli ang mga Cristohanong nasaag, ug mapabalik ngadto sa Ginoo ug sa pakig-ambitay sa iglesia ang mga balaang nanga-backslide (Efe. 5:14; Sant. 5:19; Gal. 6:1).
Efe. 5:14—Busa niingon Siya, Pagmata, hingatulogon, ug bangon gikan sa mga minatay, ug mohayag si Cristo kanimo.
Sant. 5:19—Mga igsoon ko, kon duna kaninyoy gipasalaag gikan sa kamatuoran ug dunay nakapabalik niya,
Gal. 6:1—Mga igsoon, bisan pag nadaog sa kalapasan ang tawo, kamong mga espirituhanon maoy mopahiuli nianang tawhana diha sa espiritu sa kalumo, nga magbantay sa inyong kaugalingon kay basin matintal sab mo.
Pagpangalagad: Ang Kinabuhi sa Pag-ampo sa Hiniusang Cristo
Ang kinabuhi ni Cristo sa pag-ampo maoy sentro sa pagpatuman sa Dios sa pangagamhanan Niya dinhi sa yuta. Gipakita kini sa Bugna 8. Apan moingon tingali ang ubang nagbasa sa Bugna 8 nga, “Dili nato makita sa Bugna 8 ang pag-ampo ni Cristo. Ang mga pag-ampo ra sa mga balaan ang makita nato.” Apan, nausa man ni Cristo ang mga balaan. Dili mga pag-ampo ra sa tinagsang Cristo ang mga pag-ampo sa Bugna 8, nahimo na kining mga pag-ampo sa hiniusang Cristo. Kalabot sa pagpatuman nga nahitabo sa halaran sa incienso, nausa gyod ni Cristo ang mga balaan. Busa, sa paghisgot nato ning mensahea sa kinabuhi ni Cristo sa pag-ampo, ang gipasabot nato mao ang kinabuhi sa pag-ampo sa hiniusang Cristo. (Pagtuon-sa-kinabuhi sa Exodo, p. 1526)
© Living Stream Ministry. Used by permission.
ADLAW 9: PAG-AMPO NGA ALANG SA NAGKATIBULAAG NGA MGA MAGTUTUO
Buh. 9:2, Buh. 26:19; Esd. 1:5; Ezeq. 36:24
Nga makakita sa langitnong panan-awon sa walay kataposang tuyo sa Dios ang nagkatibulaag nga mga magtutuo, madasig diha sa ilang espiritu aron magtinguha sa mas lalom nga mga butang ni Cristo ug sa pagtukod sa Dios, ug molakaw sa dalan sa pamatigayon sa Dios sa Bag-ong Tugon (Buh. 9:2, Buh. 26:19; Esd. 1:5; Ezeq. 36:24).
Buh. 9:2—Ug nangayo niyag mga sulat alang sa mga sinagoga sa Damasco, aron kon duna siyay makit-an nga iya sa Dalan, mga lalaki ug mga babaye, madala niya sila nga ginapos ngadto sa Jerusa lem.
Buh. 26:19—Tungod niana, Haring Agripa, wala ko mosupak sa langitnong panan-awon.
Esd. 1:5—Unya nanindog ang mga pangulo sa mga balay sa mga amahan sa Juda ug sa Benjamin ug ang mga sacerdote ug ang mga Levihanon, bisan ang tanan nga ang espiritu gidasig sa Dios nga motungas aron motukod sa balay ni Jehova, nga naa sa Jerusalem.
Ezeq. 36:24—Ug kuhaon mo Nako gikan sa mga nasod ug tigomon mo Nako gikan sa tanang kayutaan ug dad-on mo Nako ngadto sa kaugalingon ninyong yuta.
Pagpangalagad: Ang Panginahanglan sa Pagpangamuyo
Sa kasinatian nato moduol gyod ta sa halaran, sa dolang, sa talad, sa tangkawan, ug sa arka. Segun sa pagtuon nako sa Biblia, sa makaduol na ta sa arka sa Dapit Labing Balaan, mobalik gyod ta sa halaran sa incienso. Dili usa ka butang sa agianan sa tabernaculo ang halaran sa incienso. Ikatandi hinuon kini sa motor nga magpalihok sa tanang butang. Busa, nagbarog ang halaran sa incienso ingog kambyohanan. Magsige gyod tag balikbalik ning kambyohanan. Nagpasabot kini nga aron makasinati sa bisan unsang aspeto sa sawang o sa tabernaculo, mag-ampo gyod ta. Kon mag-ampo ta, molihok ang tanan. Kon mag-ampo ta, maepektibo sa kasinatian nato ang halaran, dolang, talad, tangkawan, ug arka. Apan, kon mohunong ang motor, mohunong sab ang tanan. Kon moandar ang motor, moandar sab ang tanan. Mao nga nagkinahanglan tag motor—sa nangamuyong Cristo—nga magbuhat sa sulod nato. Nagkinahanglan tag kinabuhing nag-ampo, usa ka kinabuhi sa pag-ampo. (Pagtuon-sa-kinabuhi sa Exodo, pp. 1535-1536)
© Living Stream Ministry. Used by permission.
ADLAW 10: PAG-AMPO NGA ALANG SA PAGKAHIUSA
Rom. 15:6; Col. 3:10-11
Nga madaogong magkahiusa ang tanang kaiglesiahan, nga usa ray baba nga maghimaya sa atong Dios ug sa Iyang Cristo aron mapalugwa ang realidad sa usang bag-ong tawo (Rom. 15:6; Col. 3:10-11).
Rom. 15:6—Aron sa usa ka baba hiniusa mong maghimaya sa Dios ug Amahan sa atong Ginoong Jesucristo.
Col. 3:10-11—Ug gisul-ob na ang bag-ong tawo, nga gibag-o ngadto sa hingpit nga pagkaila uyon sa dagway Niya nga naglalang niya, nga niini dili na mahitabo nga dunay Gresyanhon ug Judio, sinirkunsisyonan ug dili sinirkunsisyonan, luog, Sityanhon, ulipon, tawong gawasnon, kondili si Cristo ang tanan ug naa sa tanan.
Pagpangalagad: Mag-ampo diha sa Dios ug uban sa Dios nga naa sa Sulod Nato
Nagpakita ang hulagway sa tabernaculo ni Cristo nga Dios nga nagpakatawo nga naa kanunay nga kasudlan nato. Kining Cristo mao sab ang tanang halad nga naghimo natong angayan pinaagi sa pag-abli sa agianan ngadto sa Dios ug sa pagpuno kanato sa sulod. Tungod niini, naa ta sa Dios, ug naa ang Dios kanato. Busa, sa panahon nga moabot na ta sa halaran sa incienso, naa na ta sa Dios, ug naa ang Dios kanato. Kay naa man ang halaran sa incienso sa sentro sa tabernaculo, nga nagtimaan sa Dios nga nagpakatawo, ang maanaa ning halarana mao ang maanaa sa Dios nga nagpakatawo. Labot pa, kon naa ta sa Dios, naa sab Siya nato. Sa halaran sa sawang masinati nato ang mga halad, ug duna tay dugo nga maghinlo nato ug unod nga magbusog nato. Maghimo kini natong angayan nga mosulod sa nagpakatawong Dios, nga nagpuyo sa sulod nato ingog kalan-on nato, kun sangkap nato sa kinabuhi. Bisan kinsang moduol sa halaran sa incienso usa ka tawo mang naa sa Dios ug dunay Dios sa sulod niya. Nausa ug nasagol siya sa Dios. Pagkadako ning butanga! (Pagtuon-sa-kinabuhi sa Exodo, p. 1541)
© Living Stream Ministry. Used by permission.
Magmalahutayon sa pag-ampo.